სამთო-სათხილამურო კურორტი გუდაური, ყაზბეგის მუნიციპალიტეტში, თბილისიდან 120კმ-ში, ზღვის დონიდან 2 200 მეტრის სიმაღლეზე მდებარეობს. გუდაურში არსებული ბუნებრივი პირობები, უხვი ნალექი და ხარისხიანი თოვლი, სამთო-სათხილამურო კურორტის შექმნის მთავარი წინაპირობა გახდა, პირველი საბაგირო გზა კი 1988 წელს აშენდა. ზღვის დონიდან 2 200 მეტრზე მდებარეობა, შთამბეჭდავი ალპური ხედები და საუკეთესო ტრასები მიმზიდველია სრიალის ნებისმიერი მოყვარულისთვის - განურჩევლად უნარებისა და გამოცდილებისა. საერთაშორისო სტანდარტის შესაბამისად, კურორტზე ოთხი სხვადასხვა სირთულის სათხილამურო ტრასაა: ლურჯი, მწვანე, წითელი და შავი, რითიც გუდაური პასუხობს ყველა კატეგორიის მოსრიალის სურვილს. კურორტი გუდაური საერთაშორისო სათხილამურო და სნოუბორდის ფედერაციის (FIS) ეგიდით დაგეგმილი სპორტული შეჯიბრებების ყოველწლიური მასპინძელია.

უნიკალური ბუნებით, წიწვოვანი ტყეებითა და სუფთა ჰაერით გამორჩეული სამთო-სათხილამურო კურორტი ბაკურიანი ბორჯომის მუნიციპალიტეტში, ზღვის დონიდან 1700 მეტრზე მდებარეობს. ბაკურიანი იდეალური დანიშნულების ადგილია, როგორც დამწყები მოთხილამურეების, ისე სრიალის გამოცდილი მოყვარულებისთვის. კურორტს სათხილამურო სკოლების სიმრავლე და საოჯახო დასვენებისთვის საუკეთესო პირობები გამოარჩევს. ბაკურიანი 3 სასრიალო არეალს: დიდველს, კოხტასა და მიტარბს აერთიანებს. თანამედროვე ინფრასტრუქტურა და ხელოვნური გათოვლიანების სისტემები, კურორტზე სასრიალო პირობებს მაშინაც უზრუნველყოფს, როცა ზამთრის ბუნებრივი ამინდი არახელსაყრელია. 2023 წლის 18 თებერვლიდან 5 მარტის ჩათვლით, ბაკურიანმა ფრისტაილის, სნოუბორდისა და ფრისკის მსოფლიო ჩემპიონატს უმასპინძლა. ღონისძიებას 175 მლნ. მაყურებელი ადევნებდა თვალს, რამაც ხელი შეუწყო ბაკურიანის, როგორც ზამთრის სპორტის დანიშნულების ადგილის დამკვიდრებას მსოფლიო მასშტაბით.

კულტურული მემკვიდრეობით, სამზარეულოთი და იუნესკოს სიით დაცული არქიტექტურული ძეგლებით გამორჩეული კურორტი მესტია, ზღვის დონიდან 1500 მეტრზე, კავკასიონისა და სვანეთის ქედს შორის, სვანეთის რეგიონში მდებარეობს. კურორტი ჰაწვალისა და თეთნულდის სასრიალო არეალებს აერთიანებს და თბილისიდან დაახლოებით 460კმ-ით არის დაშორებული. თუმცა, ქვეყნის შიდა ფრენით, ნატახტარისა და ქუთაისის აეროპორტებიდან აქ მოხვედრა 30-40 წუთშია შესაძლებელი, რაც ნებისმიერ დამსვენებელს აძლევს საშუალებას, ხანმოკლე დროში აღმოჩნდეს ზემო სვანეთში - რეგიონში, რომელიც შუა საუკუნეებისთვის დამახასიათებელი არქიტექტურით, უნიკალური სვანური კოშკებითა და სოფლებით, იუნესკოს მსოფლიო მემკვიდრეობის ძეგლთა ნუსხაშია შეტანილი.

გოდერძი, რომელიც მდებარეობს აჭარის რეგიონში, უნიკალური სათხილამურო კურორტია, რომელიც ცნობილია შავი ზღვის სანაპიროსთან სიახლოვით. ის გთავაზობთ ალპური და სუბტროპიკული კლიმატის ნაზავს, რაც უზრუნველყოფს უჩვეულო სათხილამურო გამოცდილებას. კურორტი განკუთვნილია როგორც დამწყები, ისე მოყვარული მოთხილამურეებისთვის.